信成假期董事侯叔祺一直喺旅遊界打滾多年，過去亦成日亮相報章電視訪問，不過自從佢早前捲入多宗錢債糾紛後，都少咗見佢出席公開場合同各界「打交道」，據聞最近佢又有新動靜，就係離開咗負責推廣同促進內地旅遊資源嘅中國旅遊協會（中旅協）領導層！
中旅協今年成立廿周年，會員以經營港人同外國旅客往內地旅遊業務為主。消息指，中旅協早前內部醞釀新一屆領導層名單，本身係常務理事嘅侯叔祺榜上無名，主因係之前推舉人選階段，侯叔祺未獲得提名，換言之侯將無機會出任常務理事。有業界中人估計，侯叔祺呢次「被離開」中旅協領導層，相信係同佢之前捲入糾紛有關，不過亦有人形容呢啲係事後孔明嘅分析，究竟孰真孰假留待大家判斷喎。
講番中旅協領導層換屆，消息指，美心餐飲王國創辦人伍沾德如無意外會繼續冧莊做香港中國旅遊協會會長，至於理事長好大機會由中旅執行董事盧瑞安繼續出任。有知情人士話，伍沾德曾有意退位讓賢，不過業界中人認為伍係飲食界泰山北斗，所以再三希望佢繼續留任，否則唔知搵乜人頂上至好喎。