身高差距大 鏡頭顧此失彼
話說兩人喺會面後見傳媒匯報會面情況，有人就覺得好奇怪，因為兩個人明明一齊見王光亞，但點解出來後要分開做訪問呢？唔知仲以為佢哋喺唔同場合出現。究竟係佢哋不和，定係高佬賢年紀輕輕做到團長就爭住講嘢出風頭呢？
其實成件事純屬誤會，話說高佬賢同陳勇齊齊企定定接受訪問，但由於兩人身高差距好大，當電視台攝影師影高佬賢時，同一水平線上其他人都「被消失」。
到陳勇講話時，咁啱隨團團友又出晒嚟，陳勇嘅浩大聲勢自然同高佬賢講嘢時有啲出入，又難怪人哋誤以為係兩個場合嘅。高佬賢一向鶴立雞群，經常都令企佢隔籬嘅人覺得尷尬。
所以話呢，生得高嘅人都會有生得高嘅煩惱o架。