政情：譚志源維繫婚姻有辦法
如果丈夫因為工作需要經常離港，老婆又好想知丈夫去咗邊，但丈夫又有口難言，唔知點講可以點做？近期經常要往返內地做「內交」嘅政制及內地事務局局長譚志源（Raymond）就有一招可以供大家參考，不過對部分人嚟講，要練成呢招需跨過一定心理關口，因為呢個方法就係自拍。
打電話亦得
高官政要經常要四出外訪，要維繫婚姻一啲都唔易，就好似俄羅斯總統普京咁，平時好日都唔同老婆一齊出席活動，點知最近一次公開露面就宣布離婚，原因之唔係二人聚少離多，最後搞到分開囉。不過，經常要離港外訪嘅Raymond就話，要同家人保持聯絡都唔係太難啫，就係出差時拎個手機出嚟，自拍或影低身邊嘅一啲人同事，然後發個短訊畀家人，一來報平安，二來可以話畀家人聽自己去過咩地方、見過咩人。
如果你覺得喺眾目睽睽之下自拍需要太多勇氣，自拍交差太難練成，Raymond仲有一招回歸基本步可以畀大家參考，就係打電話，而每日打畀阿媽仲可以喺小朋友面前做個好榜樣，等佢哋知道要點對待長輩。