本身係精神科醫生嘅九龍城區議員黃以謙，過去曾多次參選立法會，又傳應徵過食物及衞生局副局長，可惜兜兜轉轉都係無功而回。
唔知係咪因為咁，近日黃以謙就喺社交網站上載咗一張鬍鬚造型、官仔骨骨嘅近照，驟眼睇真係以為黃以謙進身政府，原來佢只係想大家品評一下新造型啫。
雖然有網友讚型，但亦有網友留言「謙謙君子，不留鬍子」，更有人覺得新形象「似潦倒馬來亞小商人」，但黃以謙就回覆唔捨得剃喎。
黃以謙無端端變身做「鬍鬚謙」，莫非佢仲雄心壯志想藉鬍鬚造型博反彈加入政府？
（互聯網）