政情：黑英自爆「混」過聖士提反女生
前天文台台長林超英（黑英）日前撰文，踩過界力撐聖士提反女校舊生反對該校轉直資，該校女同學與英皇仔黑英當年分屬左鄰右里，黑英今次罕有轉戰向教育界陣營開火，唔通以前同該校女同學特別熟落？黑英就自爆當年真係同佢哋「混」過，不過係「混聲」嗰個「混」，同佢哋組混聲合唱團參加校際比賽咋，叫大家咪心邪。
前英皇仔 識女仔怕醜
心繫母校英皇書院嘅黑英話，近年中西區名校相繼轉直資，等同有錢人買貴飛，去主題公園唔使排隊玩遊戲咁，基層學生「被打尖」變相冇機會讀名校，又自言當年作為家族入面第一個大學生，能夠光宗耀祖全靠自己努力。不過，講到識女仔，黑英就話當年佢守禮又怕醜，白白錯失咗識鄰校女仔嘅機會囉！
對於政府有意喺反對呼聲下，就擴建三區堆填區硬闖立法會，黑英無奈承認，要當區市民承受全香港人嘅垃圾的確唔公義，建議政府參考外國例子，喺受影響地區興建多啲社區設施作為補償，但講到尾都係買少啲、食少啲、着少啲，從源頭開始減廢喎。不過，如果人人都好似黑英咁，年中兩套西裝輪流着，商家真係多得佢唔少。