中環出更：兩孫就出世 李運強送玉墜
「造紙大王」理文造紙主席李運強好快又做爺爺，仲要係連續做兩次添！皆因佢嘅兩位新抱，李文恩太太郭靜怡（Lorinda）及李文斌（Edmond）太太何芷韻（Amanda）不約而同有咗身孕，預產期分別喺本月同七月，認真係好事成雙，卓妮都要講聲恭喜！
買原璧雕琢錫到燶
卓妮日前喺馬場遇到李運強太太衛少琦同Edmond夫婦，以素顏示人嘅Amanda雖然腹大便便，但手腳依然好敏捷，面上仲流露出幸福嘅表情，Edmond就喺身邊小心翼翼咁扶實愛妻。已有生BB經驗嘅Amanda話，今次佗BB完全冇壓力。問佢哋呢一胎係男定係女？Edmond笑言，上一胎係龍鳳胎，已經湊夠一個「好」字，呢一胎係仔定女都冇所謂喇！
卓妮問李太同老公打算送乜畀兩位即將出世嘅乖孫？李太就話，根據佢哋家鄉傳統，都會送玉墜畀初生嬰兒。佢哋更別出心裁，特別買來一件原塊璧玉，交畀玉石師傅雕琢出獨一無二嘅玉墜。價值連城嘅原璧唔易搵，李運強夫婦果然係錫孫錫到燶！
卓妮