政情:張華峰反應奇大 議員為「動物」拗餐飽

究竟人類係咪動物呢?小學常職科教落,人類係哺乳類動物,而古希臘哲學家亞里士多德就話,人類係政治動物。不過,呢個問題尋日就喺立法會財經事務委員會掀起一場爭論。

搬埋《聖經》出嚟

近期商品交易所因資金不足被撤銷自動化交易服務牌照,令人關注證監會相關規管制度,而金融服務界張華峰早前亦講過,一般證券商涉及類似財務問題,一早就會被拉人封舖。不過,證監會行政總裁歐達禮尋日就解釋,證券經紀同商交所呢類自動化交易服務提供者性質不一,難以比較,仲輕輕講咗一句,其實兩者係「Two different animal」。點知張華峰一聽到animal(動物)就好大反應,話業界係專業人士,唔係動物,搞到主席李慧琼都尷尬叫歐達禮唔好再用animal。

法律界郭榮鏗就話,其實亞里士多德都有句名言話「人係政治動物」,諗住打圓場叫張華峰唔使咁大反應啦,點知張華峰嘅戰友石禮謙見對方出動到古希臘哲學家,於是就拉埋《聖經》落水,話神按自己形象造人,所以人唔係動物喎,之後仲解釋人類係mammals(哺乳類動物),而唔係動物。照咁睇,哺乳類動物同動物之間咪真係有好多討論空間?

第一手消息請下載on.cc東方互動iPhone/iPad/Android/Windows Phone Apps