政情：語氣明顯慈祥咗 蔡堅收晒火等抱孫
醫學會前會長蔡堅醫生出名敢言同火爆，經常對香港醫療大小事不平則鳴，但相信喺不久嘅將來，有一個人可以令呢位潮州怒漢收火。邊個咁巴閉？咪就係佢即將出世嘅乖孫囉！蔡醫生膝下有兩位公子，其中從事金融業嘅大仔兩公婆早年定居加拿大，去年終於成功「造人」。蔡醫生話，大新抱預產期係今個月，暫時知道係「蛇仔」。
撲機票鬥輸畀肥胡
首次升呢為「蔡爺爺」，蔡醫生連講嘢語氣都頓時變得慈祥咗，佢話自己好開通，就算下一代想唔想生小朋友，佢都唔會過問。不過，睇得出蔡醫生心底都好想快啲見吓乖孫，話說早幾日佢出席一個新聞團體晚宴，有航空公司送出「雙人香港來回任何目的地商務客位機票」作為抽獎禮品，中獎者將機票捐番出嚟拍賣。
蔡醫生抱孫心切，即時出價，最高叫價至六萬四千元，但最後都係由醫院管理局主席胡定旭（肥胡）以八萬元投得。蔡堅話，原本諗住投得呢兩張機票，就會日內出發去加拿大迎接孫兒，依家爭輸咗畀肥胡，只好自己撲機票喇。