中環出更：孫德基搵過雷添良取經
香港華人會計師公會早前喺灣仔會展舉行一百周年慶典晚會，筵開一百席並有百頭醒獅助興，唔少政商及會計業界人士到賀。其中審計署署長孫德基同羅兵咸永道會計師事務所合夥人雷添良（Tim）都有捧場，原來二人都好有淵源，前後腳做過香港會計師公會會長。
均曾任會計師公會會長
孫德基話，佢同Tim認識咗最少二十年，對方早過自己做會計師公會會長，笑言自己當年上任前都有搵Tim取經。Tim之後補充話，除咗會計師公會會長，佢哋兩個都做過科技大學校董會成員，認為二人好有淵源喎！
會計界出名對數字敏感，核數查數都冇走漏眼外，都有人情味嘅一面，事關會計界出身嘅發展局局長陳茂波（Paul）都有出席晚宴，見番啲業界好朋友。曾力撐會長林智遠參選立法會會計界功能界別嘅阿Paul話，返回會計界呢個大家庭感到好熟悉，又話雖然自己未做過華人會計師公會會長，但本身係該會榮譽顧問同會員，睇嚟無論係官場內外，阿Paul同林智遠交情都不變。