中環出更：細佬愛駒首戰 杜振源捧場
有「快勞夾大王」之稱嘅國際小母牛香港分會籌款委員會主席杜振源（Simon）一向都活躍於馬圈，旗下以「按」字為首嘅馬匹多不勝數，而佢胞弟杜振安（William）都一樣咁熱愛賽馬運動。尋日卓妮喺沙田馬場，遇到佢哋兩兄弟孖住現身，皆因William旗下靚駒「飲食之星」首度出賽，Simon專程嚟捧細佬場，認真兄弟情深。
兩兄弟有錢齊齊搵
尋日陽光好猛，William戴住黑超現身好有型，佢話暫時擁有嘅現役馬匹只有「飲食之星」，不過佢已非首次做馬主，曾經擁有過七匹駿駒。近年Simon進軍飲食界，仲做得好成功，佢話過嚟緊仲會積極開多三間高級食肆，將部分收益捐畀小母牛。William就順理成章，將呢匹馬嘅名都改為同飲食有關。
唔知佢哋未來除咗「按」系馬匹之外，仲會否開發多個「飲食」系呢？William透露，自己依家喺哥哥間文具公司幫手，亦有兼顧飲食生意，兩兄弟實行有錢齊齊搵，有善事齊齊做，二人同心拍住上。
卓妮