政情：高佬賢救漁農界一命

香港漁農業算係一路萎縮嘅行業，但就有立法會議席代表業界，而特首選委會內更有成六十個代表，唔少人都想踢走呢個界別。除咗漁農界，立法會唔少功能界別議席都換咗人，好似體育、演藝、文化及出版界就由上屆嘅霍震霆換咗馬逢國，金融界同金融服務界亦分別由吳亮星同張華峰頂替上屆嘅李國寶同詹培忠，以致過往嘅立法會大懶蟲因換屆而只剩下一個鄉議局劉皇發。

據聞政府都評估過今次功能界別換人嘅影響，幾位新議員上任後都尚算勤力，似乎大家就少咗藉口取消功能界別。加上新丁議員起碼都肯去開會，政府畀泛民圍插時多把聲幫手，呢個可以話係政府嘅意外收穫。話說回來，聽聞喺漁農界內，自高佬賢上場後，其後生形象令人煥然一新，吸引力大咗，反對聲音唔知係咪呢個原因少咗呢？

率團訪京　攞盡威風

好似早前高佬賢率領漁農界訪京，喺根叔年代就唔及佢威風喇，事關當年接見漁農界嘅多數係京官副手，但今次就由國務院港澳辦主任王光亞接見，高佬賢仲坐正喺王光亞旁邊、正中間嘅位置，想睇唔到佢都幾難。會議之後，高佬賢仲做埋傳話人，講述會內講過嘅言論添，證明佢幾受重視。

唯一美中不足嘅就係，事後有人質疑高佬賢啲普通話能力，話佢將王光亞嘅言論翻譯錯誤，將特首冇「方案B」講成冇「formula B」。不過，高佬賢就堅稱王光亞肯定有講過「formula B」呢個字眼，但啲人點講佢都冇所謂喎，果然吃得開。