中環出更：陳正欣勁Like本土文化
香港有唔少細微嘅本土文化值得保留，但好易被人忽略。保良局總理陳正欣（Daniel）對此都好關注，日前佢同太太陳慕婷（Angel）出席一個場合時話，自己年前獲政府委任為衞奕信勳爵文物信託受託人委員會及基金委員會成員，負責撥款畀民間組織，保育非官方認可嘅文物。
Daniel舉例話，新界有唔少圍村村民都講客家話，但原來每條村嘅客家話都有少許差異，隨住老一輩相繼離世，呢啲獨特嘅語言將面臨失傳。該委員會經審批後，會撥款畀志願民間組織，將有關文化製成文獻作為參考紀錄。又好似大嶼山大澳嘅龍舟盛會、飄色巡遊等傳統節日儀式嘅經費，以及將過去部分電台節目嘅內容數碼化等，均由該會資助。
致力保育 留畀下一代
Daniel話，該組織已成立二十年，佢就加入咗三年，從中了解好多書本上冇記載嘅香港歷史。講到難忘經驗，佢話有次遇到一班有心人前來申請撥款，專門打理及翻新無人修葺嘅墓地，呢種無私奉獻嘅精神，令佢深受感動。Daniel覺得，好應該保存呢啲獨有嘅文化畀下一代認識，希望將來有更多善心人出錢出力。
卓妮