政情：今日你上鏡：「盛」勢拖Duck

有「扮嘢文」之稱嘅海洋公園主席盛智文，每次出場都會帶畀大家驚喜，尋日佢就特登拖住隻縮細兼山寨版黃色巨鴨出場，唔知係咪想食住個勢抽水做宣傳呢？被問到早前有網民拍到海洋公園有海豚撞向池邊再直插池底嘅圖片，懷疑海豚自殘，盛智文就即刻否認，佢話對有關傳聞感到傷心，強調海洋公園有六十個護理人員同獸醫，日日都好畀心機咁照顧啲動物。海洋公園亦解釋，懷疑自殘嘅海豚Pinky自細喺海洋公園長大，由於池邊設有紅外線警報，Pinky想引起職員注意，所以先習慣喺池邊跳躍，但依家已經好少咁做喇。