政情︰韓連山技癢晒英文
唔係息影藝人先會技癢復出，好似退休前任教英文嘅教協理事韓連山，尋日為民陣公布七一遊行記者會撐場時，原本諗住發言後就坐定定退居幕後，點知民陣召集人孔令瑜面對記者以英文提問時，雖然未至於口啞啞，但其濃厚嘅港式英語隨即引起韓連山注意並「出山」代答，背後加多塊黑板真係以為自己上緊英文堂。
應對流利 似復出教書
話說孔令瑜搞咗咁多年遊行，應付記者提問理應綽綽有餘，但當孔令瑜遇上韓連山就唔係咁講法。尋日孔令瑜回答第一條英文問題時，韓連山已經對孔令瑜用英文解釋向警方申請「五萬」定「五十萬」人上街相當懷疑，惟有立即變身韓老師，以流利英文重複孔令瑜嘅睇法，仲代答之後好幾條英文問題，更識得喺「NOT」等重要字眼加重語氣，難怪孔令瑜同身旁嘅副召集人王浩賢當堂好似學生咁坐定定，聽韓老師教英文。
查實韓連山多年來以「反」出名，好似反對小學縮班殺校、反對推行語文基準試，上年反國教期間更自告奮勇參與絕食，創下年紀最大、絕食時間最長嘅紀錄，中氣十足嘅韓連山除咗識得講英文，依然好打得。