病婦離奇甩喉 遺屬問罪威院

六十九歲的清姨曾患肺癌，痊愈後肺功能欠佳且患有長期支氣管擴張疾病。今年一月，清姨因氣促而向威院急症室求診，被安排住院並以呼吸機協助呼吸，勤伯到醫院探望妻子時，清姨仍能正常應對。

不過，勤伯兩小時後再到病房，已發現妻子佩戴的氧氣罩喉管鬆脫，「有乜理由條管甩咗都冇人知？個醫生仲話係我老婆同意佢掹喉，唔救佢！都冇通知過我哋！」妻子離奇離世，勤伯既傷心又憤怒，院方卻未能解釋喉管鬆脫原因，「有護士仲話可能係條喉自己甩，一個話掹喉、一個又話甩咗，到底係點？」

病人意願 院方無與家屬溝通

威院發言人表示，病人住院期間一直佩戴呼吸機，護士會每小時監察及記錄維生指數，呼吸機並無異樣。及後病人家屬指病人失去知覺，病房經理指病人呼吸機面罩喉管當時並無鬆脫，但召喚其他職員協助、再面向病人時即發現喉管鬆脫，懷疑喉管在病人被接觸期間受碰撞而鬆脫，已即時駁回，個案現已呈交死因裁判法庭確定死因。

發言人強調事件與拔喉無關，並指病人曾向醫生表示若心肺停頓，不願意接受介入性搶救程序，但承認若醫生能就病人的決定與家屬事先溝通，將有助家屬理解及作好心理準備。「醫院講大話！我叫人嚟嗰陣條管已經甩咗！」勤伯質疑醫院隱瞞真相。

呼吸系統專科醫生梁宗存指出，一般情況下喉管不會鬆脫，需用力扯才能拔出，而喉管鬆脫的可能性很多，如接駁不佳、病人轉身或落床均有機會鬆脫。梁又稱若病人病情嚴重，不排除有其他原因導致死亡，「如果已經要用呼吸機協助呼吸，喉管鬆脫當然對病人有影響，甩咗嘅時間愈長、影響就愈大。」

「個決定關乎生死咁重要，最好就搵埋家屬一齊做見證，如果家屬當初有份參與知道病人嘅意願，就唔會搞成咁。」香港病人組織聯盟主席曾建平認為事件凸顯院方與病人家屬欠缺溝通，建議院方若有紀錄證實病人曾簽紙不接受急救，應向家屬展示，以釋疑慮。