中環出更：政商名人齊賀莊學海嫁女
「鐘錶大王」中南鐘錶創辦人莊靜庵嘅次子莊學海（Bob）家有喜事，佢嘅長女莊錦兒（Karen）下嫁廣州長隆集團董事長蘇志剛嘅長子蘇展鵬，婚宴早前喺九龍一間酒店盛大舉行，到賀嘅政商界名人冠蓋雲集，仲有Bob嘅姐夫長江集團主席李嘉誠、外甥李澤鉅夫婦、表外甥「磅王」查毅超夫婦等親戚，場面好墟冚。
喜上眉梢嘅阿Bob同太太成晚化身布景板，同魚貫入場嘅賓客影相，阿Bob哥哥莊學山及弟弟莊學熹亦落場迎賓。原來Karen係莊靜庵家族第三代後人之中，第一個成家立室，見到莊家開枝散葉，難怪幾兄弟當正自己辦喜事，個個笑到見牙唔見眼。
莊學山飛咗個大光頭，新形象好受老友歡迎，吸引光頭形象鮮明嘅前鐘錶業總會主席梁青華捉住佢合影。卓妮趁機問佢大埔洞梓慈山寺觀音像嘅進展，莊學山話，工程接近尾聲，跟住要度橋搞好導賞及接待善信嘅安排，事關寺院係淨化心靈之地，唔想變成旅遊景點。篤信佛教嘅香港大學專業進修學院院長李焯芬都有到場，佢亦係慈山寺嘅董事局成員，佢形容寺院係一座好優雅嘅唐式建築，寶殿牆身仲嵌有來自敦煌嘅珍貴壁畫，希望今年底可以對外開放。
被問婚事 許晉平耍太極
中建企業董事許晉平同女友「九巴金公主」伍穎梅（Winnie）亦結伴沾喜氣。兩人拍拖就嚟三年，Winnie成日被卓妮追問幾時結婚，難得見到男主角，梗要問佢幾時迎娶女友啦！許晉平好淡定笑笑口：「到時咪知囉！」同Winnie過往嘅答案一模一樣，認真有默契。
卓妮