政情：楊受成睇畫展行勻全場
中國當代藝術家方力鈞、尹朝陽嘅聯合展覽《塵土與光榮》，尋日喺畫廊ART ONE開幕，以諷刺人物「傻笑人」出名嘅畫家岳敏君及羅荃木都前來捧場。ART ONE新世界中國地產執行董事方承光、英皇集團主席楊受成、港區政協委員李秀恒（Eddy）等愛好藝術嘅名人，紛紛前來一睹名師傑作。
楊受成對場內畫作好有興趣，差唔多行勻晒成個展覽，每幅作品都駐足欣賞，但佢對畫家方力鈞個名更好奇。佢喺欣賞方力鈞畫作時，笑問身邊嘅方承光：「方力鈞同方力申（歌星）有冇關係？」事實上二人確係有關，事關畫廊係方力申家人嘅朋友開設，但兩人就冇血緣關係喇。其實尋日方力申都有去，仲同楊受成合照。
李秀恒將出版動物攝影集
熱愛攝影嘅Eddy透露，年底將出版一本動物攝影集，佢話自己去過四次東非肯尼亞，影過動物大遷徙、日落日出，可惜未影到由數以萬計紅鶴形成嘅「紅鶴湖」，嚟緊會去第五次，希望捕捉到奇景。至於岳敏君亦透露，十一月中將在澳門辦畫展，佢覺得香港藝術展覽場地太少，期望未來有更多空間畀藝術家展示創作。