中環出更：女王「豹」吼 小曾子變鵪鶉
隨《太陽報》免費附送嘅《好報》，早前獨家報道「貪曾」前特首曾蔭權爵士幼子曾慶淳（Thomas）為咗追女仔，化身「曾慶淳」與惹火「豹紋女」石珮琳（Vivien）喺垃圾邊癡纏。不過，Thomas未有因此而收斂，尋日《好報》再度直擊佢為氹女友，改頭換面變身「小曾子」，頭耷耷硬受「女王」Vivien霸氣「豹吼」，其後仲掹衫尾殿後陪伴女友出巡，認真丟架，難怪Vivien笑到擘大口見到喉嚨椗喇！
據講Thomas對女方嘅癡戀程度簡直泥足深陷，平日無所事事就黐實對方，十足女王身邊嘅「小曾子」。然而Vivien向來有異性緣，日前穿超短迷你裙到中環夜蒲時，趁Thomas唔喺身邊，主動與一名身高六呎嘅猛男搭訕，傾到興起時更情不自禁獻吻。
未幾Thomas收到風，即趕到夜場「踢竇」並接走女友，奪回主權。個子不高嘅佢，當晚脫去老土眼鏡，並換上Slim Fit恤衫，可惜無法改變嘅係身高，與腳踏四吋高踭鞋嘅女方企埋一齊，即高下立見。
縮女友身後掹衫尾陪笑
唔知係咪Thomas敗了Vivien嘅夜蒲雅興，二人離開夜場，與一眾友人到便利店購物時，女方突然企喺門口，擘大喉嚨兼手指指對住Thomas訓話，被噴到一面屁嘅「小曾子」頭耷耷緊握拳頭，粒聲都唔敢出，此時身旁更有人舉機拍照贈「慶」。為氹番女友，「小曾子」只好施展冧功，小鳥依人般全程黐實「女王」，更縮喺對方身後掹住其衫尾，其後更翹到實一實，驚死被女方撇甩，Vivien就不時風騷喪笑。
直至凌晨四點半鐘，Vivien拉大隊到餐廳醫肚，過馬路時「小曾子」忽然變Man，衝出馬路截停車輛讓眾女過路，其後搶先走入餐廳攞位兼為眾女點菜，期間更邊食邊陪笑，似乎想喺女友面前挽回分數。眾人食飽後已近天明，一行人上的士往跑馬地方向離去。
亂報地址 貪曾知法犯法
Thomas被揭夜夜笙歌，佢阿爸貪曾都唔好得去邊，今期《好報》再揭發貪曾新一宗知法犯法惡行，佢名下一輛平治S320L房車，車輛登記資料嘅地址一欄，竟無遵從法例填報真實住址，只填前任行政長官辦公室嘅地址，直至最近才撥亂反正，報回現居嘅淺水灣地址。
卓妮