政情:《陽光時務》突停刊

曾經專訪前全國政協劉夢熊(尖啤)大爆與特首梁振英恩怨而出位嘅《陽光時務週刊》,尋日突然喺最新一期刊登公告話,下一期起將「休刊創新改造」,預計三個月內改為月刊,並開通社區型網絡平台。尖啤玩爆料,盡地一煲,結果搞到周身蟻,依家連呢份周刊都要摺埋,真係燶埋一堆。

周刊嘅前身原本係網上版,去年十月至推出印刷版,但知名度一般,直至今年一月刊登尖啤嘅專訪,先至有番少少知名度。不過,其後尖啤被廉政公署調查,更加連全國政協都冇得做。

周刊創辦人陳平接受傳媒查詢時,否認受到政治壓力,停刊原因係發行量未達理想,未來會即時把握時代脈搏。

至於周刊訂戶要喺一個月內提出要求,先至可獲退款安排。

第一手消息請下載on.cc東方互動iPhone/iPad/Android/Windows Phone Apps