政情：今日你上鏡：三兄弟？

立法會議員謝偉俊（阿Paul）一直被指同建築、測量及都市規劃界嘅立法會代表謝偉銓（Tony）好似兩兄弟，佢尋日為咗闢謠，特登帶咗細佬謝偉傑去立法會參觀。驟眼睇阿Paul同細佬幾乎成個餅印，淨係對眼同個鼻已經有幾分相似，而佢哋兩個嘅笑容都好似倒模咁一模一樣。

阿Paul細佬話自己近年住喺美國新澤西州，兩兄弟幾年先見一次，今日適逢放假先會途經香港，探完哥哥後就會同太太飛去日本旅行十日。佢又話自己對上一次返香港已經係五年前，不過就唔多覺得香港同之前有咩唔同。

講咗幾句，阿Paul就已經提醒細佬唔好講得太多，唔知係咪驚細佬爆自己啲乜嘢秘密，之後仲入宴會廳拉埋Tony出嚟影相，三個人笑到見牙唔見眼。眼前有謝偉俊謝偉銓同謝偉傑，唔知大家覺得佢哋似唔似？

第一手消息請下載on.cc東方互動iPhone/iPad/Android/Windows Phone Apps