中環出更：慈善籌款 名廚「賣肉」對決
全球經濟吹淡風，企業捐錢都要計過度過，令到慈善機構籌款難上加難。「快勞夾大王」兼國際小母牛香港分會籌款委員會主席杜振源（Simon）一於揼自己及城中老友心口。早前Simon喺旗下蘭桂坊米芝蓮星級食肆包場宴客，每位盛惠一萬元，百名賓客踴躍買枱，即刻有過百萬元善款入帳。加上靚酒及名人減肥「賣肉」作為慈善拍賣，一晚就籌到逾四百五十萬元，認真有計。
輸咗要「易服」做侍應
今次有份賣肉嘅星級名廚Harlan Goldstein，係Simon嘅食肆投資拍檔，難怪Simon即刻承諾捐十萬元響應壯舉。Harlan減肥籌款嘅野心好大，當晚只係試吓善長水溫，實情係佢同另一位星級名廚「廚魔」Alvin，尋日開始為期三個月嘅減肥對決，到時睇吓邊個減磅幅度較大，負方就要着女侍應制服到對方嘅餐廳做一日侍應，十分搞笑。Harlan會將籌到善款捐畀小母牛，而Alvin就捐畀另一間慈善機構。
咁多善長支持小母牛，主席梁錦松及太太伏明霞梗要現身，梁錦松仲罕有地揸咪高歌致謝。卓妮趁機問國寶級奧運跳水冠軍伏明霞，知唔知嫁入霍家嘅師妹郭晶晶係咪有喜，伏明霞笑笑口話，兩人平時都有聯絡，但係就冇講呢個話題喎！
當晚氣氛High爆，不過當籌委會副主席王庭聰介紹來自四川嘅何姓父女時，全場都靜晒兼眼濕濕，事關去年王庭聰跟大隊去何家探訪，獲悉何家女兒成績優異，惟家境拮据，王庭聰遂自掏腰包資助何家兩名女兒嘅學費，故事夠晒真實感人。
卓妮