政情：地舖租貴 廖偉麟「向上望」
廖創興家族後人、紀惠集團副主席廖偉麟（Jeffrey）一向投資商廈有道，面對近日經濟唔明朗，佢就話，其實以中長線為目標嘅投資亦未嘗不可。如果要買舖，佢建議買樓上舖，比起地舖更買得過，預料兩年內已可望有一至兩成回報。
貪得意做馬主
Jeffrey話，依家地舖呎價太高，動輒都要八萬元，唔抵買。佢認為，一係要買優質、擴建力強嘅舖位，即係人流多、交通便利、地點優越；一係就揀抵買嘅舖位，呎價二萬元以下嘅樓上舖係唔錯嘅選擇。Jeffrey話，舖位唔係愈大愈好，揀千零呎嘅舖就最吃香喇。
Jeffrey近日多咗一項嗜好，就係做馬主。佢近日同友人合養咗隻愛駒「夢幻拍檔」，不過原來佢已非首次養馬，身為潮州人嘅佢，早排都與同鄉合養咗匹駿駒「綠豆爽」。Jeffrey話，眼見身邊唔少好友都有涉足馬圈，所以佢都貪得意玩埋一份，順便同知己老友敍吓舊，乘機學吓嘢咁話。