中環出更:黃安源變住家男初遊馬場

沙田馬場尋日多稀客,胡琴大師兼前香港中樂團團長黃安源夫婦首次入馬場,出席一個港產陀飛輪品牌活動,事關佢醉心收藏古董錶,同場仲有知名設計師靳棣強夫婦、太子珠寶鐘錶主席鄧鉅明及寧基集團董事長沈墨寧等人。黃安源話,佢由內地移居香港三十幾年,唔打麻雀、唔買六合彩,亦唔賭馬,今次係生平第一次入馬場,笑自己唔似香港人喎!

黃安源話,退休後嘅生活主要教胡琴、玩古董錶及學書法,得閒就同太太飲吓茶、去吓旅行,生活好寫意。黃太就踢爆,自從兩人結婚四十周年之後,老公仲負責去街市買餸添!黃安源聽罷幽默補充話:「點止呀!仲要做埋家務。」估唔到才華橫溢嘅大師,原來都係住家好男人。

葉思貝帶埋望遠鏡入場

靳棣強最近就忙於喺內地開講座,兩個月內穿梭十幾個城市,十分頻撲。佢教授嘅對象主要係大學生,因為內地家長十分支持子女投身創意行業,令到報讀設計嘅學生勁多。靳叔話,相較之下,香港嘅家長始終想子女選讀金融、醫科及會計等專業,設計行業唔係咁受落。

博愛醫院副主席譚姜美珠及靚女總理葉思貝(Fione)亦現身馬場,做投資生意嘅Fione今年啱啱加入博愛大家庭,佢特別關注孤兒問題,希望加入博愛之後,多啲為老人及小朋友送暖。咪睇Fione咁斯文靚女,估唔到佢係超級馬迷,每逢賽馬日必定入場,但唔係因為爛賭,而係太鍾意馬。小妮子話,如果唔係身形太高,一早就學識策騎,難怪佢隨身帶備望遠鏡入場,百分百投入。

卓妮

第一手消息請下載on.cc東方互動iPhone/iPad/Android/Windows Phone Apps