香港政壇近排有多人被通緝，除咗「佔領中環」義工陳玉峰，因參與前年七一遊行後嘅非法集會被警方「低調通緝」而其後拘控外，屬建制派嘅荃灣區議員林琳，最近畀所屬選區內嘅商販周街貼大字報「高調通緝」，究竟佢犯咗乜事呢？
話說林琳所屬選區嘅麗城街市，租約原定明年八月先到期，但街市大業主近日突然想提早喺今年十月收番，惹來一眾商販不滿，又搵唔到當區區議員幫手，就喺區內貼大字報「通緝」林琳，怒吼「林琳區議員請盡快現身，為民請命」等。
據聞「通緝令」驚動林琳所屬政黨民建聯，質疑林琳經常出席各類社交場合同不時更新自己嘅facebook專頁，但相對就較少親身落區會見選民。據聞林琳好快就主動「自首」搵番班商販見面「補鑊」，有關大字報亦隨即拆除，雙方重新將矛頭指向麗城街市大業主，希望對方可認真回應佢哋嘅訴求。