政情：愛港之聲轟《明報》老屈
自稱「公信第一」嘅《明報》又再寫錯嘢屈人。前日東區法院再就人民力量立法會議員黃毓民同陳偉業（大舊）嘅非法集會案開庭，支持法院嚴懲兩人嘅愛港之聲成員，與到場聲援兩人嘅人力支持者互相指罵，期間更有一名男子拎住玩具膠糞追住人力主席劉嘉鴻，最後要大舊同警方介入調停。
狙擊人力劉嘉鴻
尋日《明報》圖文並茂咁，指稱該名男子係愛港之聲嘅支持者，但其實該人係人力嘅活躍成員任永強，並曾經代表人力參加一一年嘅區議會選舉。愛港之聲炮轟《明報》將人力成員誤當佢哋嘅支持者，將人力嘅「同門內訌」寫成佢哋與人力之間嘅衝突，明顯係老屈，對有關報道極表遺憾，要求《明報》立即更正澄清。
咁究竟點解任永強要狙擊劉嘉鴻呢？其實任永強早喺前日事發後已於網上發表聲明，指今次行動係要求劉嘉鴻交代邊個曾經喺人力執委會上侮辱人力創辦人黃毓民；如果劉嘉鴻再唔就侮辱毓民事件澄清，不排除將會有更加多嘅支持者喺其他公開場合質詢佢。睇嚟人力兩派之間嘅內訌正不斷升級，隨時分裂。