我們居住的城市，除了躁暴，更予人沒有安全感的焦慮。像居住在香港，除了驚恐H7N9禽流感會隨個人遊來襲，這或許是遠憂，可如今日常所喝的東江水，經本報揭發原來重金屬鐵含量超標六成，渾濁度高到嚇死人！咁嘅東江之水越山來，仲要狂加價，你話唔焦慮都會閉翳啩！
弱勢政府百事哀，撇除重大策略的「推出一項，跪低一項」明顯的政治「失效」；政府衰開有條路，連耗資五十億嘅「門常開」添馬艦新政府總部，為趕工入伙畀貪曾宣讀卸任前最後一份施政報告，一早已被傳媒揭發工程「甩甩漏漏」，門常開變成「門常漏」，貪曾為一己私欲而種下立會大樓連串豆腐渣工程疑雲，這不正是「哀樂失時，殃咎必至」嗎？
事實再次證明，立會大樓豆腐渣，一場小火，水浸五層，灑水系統好似積壓唔少冤屈氣，否則照常理唔會噴到一發不可收拾，殃及無辜嘅議員辦公室，變成水災！
講開又講，今次立會大樓小火變水災都算不幸中之大幸，自動灑水系統噴水過度，仲好過搵裙拉褲甩嘅消防處啦，消防處耗資合共近九億嘅器材，好似乜鬼數碼化無線通訊系統，竟然頻頻失靈，四日三冧機，通知得嚟分分鐘立會大樓上演港版「沖天大火災」，咁就真係該煨咯！
如今水浸啫，揭開地板可養魚，過癮！港人迷信，火燒旺地，說不定今後議事堂上，冇咁多爭拗，一時「拉布」，一時「剪布」，熱鬧過巴西嘉年華！
一場水災，正所謂「水為財」，亦即風水學所說的「山管人丁，水管財祿」，水遇到屏障，自會「低調執生」繞道而行，唔會受阻。是以一場水災，除了揭示人禍，更有玄機，財政預算撥款草案必將在死線前獲得通過。香港是福地，冇理由回歸十六年後，搞到公僕冇糧出咁大劑啩！小火變水災，大吉也！