政情：八網難逃：「跑步王」首戰兩項鐵人賽

政界有唔少鐵人，好似深水埗區議員鄭泳舜（Vincent）就係「跑步王」，繼早前參加馬拉松長跑後，前日母親節又首次挑戰兩項鐵人賽。我哋尋日見Vincent喺社交網站轉載咗啲鐵人賽相片，一班參賽者落水一刻爭崩頭，戰況激烈。佢話賽前一晚緊張到瞓唔着，朝早五點就彈起身，食過豐富早餐後，嗱嗱臨趕去淺水灣泳灘。話明係鐵人賽，參賽者要先游水五百米，再跑四公里路，但Vincent唔使廿分鐘就搞掂，奪得該組第七名，有咁好成績，佢話下次會再接再厲，仲考慮帶埋三個囝囝參加小鐵人賽喎。