立法會主席曾鈺成今日會手起刀落「剪布」，雖然佢嘅裁決得到普遍建制派歡迎，但就受到泛民主派責難。查實泛民批評剪布係意料中事，但估唔到連自由黨田北俊（田少）都猶抱琵琶半遮臉，企出來大鬧政府自製危機。
自由黨之前已經唔肯派人參與建制派輪更開會防流會，之後建制派搞聯署要求主席剪布，但該黨都唔肯參加，死撐話咁做係唔想向主席施壓，覺得佢會自行作出英明判斷喎。曾鈺成尋日宣布剪布，所有建制派本應出來支持，但田少為求同其他建制派唔同，一方面話尊重主席剪布裁決，但一方面就批評政府「靠嚇」言論不負責任。
田少話，政府呢幾日不斷聲稱如果預算案明日過唔到，所有社會運作將會停頓，佢批評呢啲言論係不盡不實同不負責任。
佢認為，政府有權再向立法會申請臨時撥款，冇理由唔畀議員充分時間辯論之餘，行政機關又可以幫立法會決定埋議員幾時要停止發言喎。
其實政府一早已經講咗再次申請臨時撥款嘅做法並唔可行，唔通田少搭遊輪遊埠嗰陣冇睇報紙？