政情：病人輪診時間冇改善 怪醫再動議解散醫管局

公院資源分配不均

怪醫解釋話，依家市民輪候公營醫療服務嘅時間之所以咁長，都係因為公立醫院嘅資源分配唔平均。佢又以九龍東聯網為例，話該聯網嘅醫院服務緊全港一成四嘅市民，但就長期都只係分到一成嘅資源。醫管局咁多年都冇改善，如果再維持依家嘅機制，啲病人都係會繼續等到頸都長，所以不如解散醫管局，等政府直接購入服務喎。

其實怪醫都唔係第一次提出呢個動議㗎喇，上屆立法會佢都有提過，但莫講話佢上屆唔好彩抽唔中，不獲分配辯論時段，就算畀佢抽得到，都估計會因為「拉布」而唔夠時間辯論。怪醫今屆連任，對醫管局繼續窮追猛打，就算今次抽唔中，相信佢都會屢敗屢戰。