近日貪湯前廉政專員湯顯明嘅擦鞋往績泉湧爆出，估計佢嘅奉承擦鞋功喺擔任海關關長時已練成，當年要求飛行服務隊安排定翼機招呼內地海關人員「公費遊機河」就係好例子，到擔任廉政專員時，又被揭發濫花公帑送禮兼宴客，確係花盡心思。不過，大家咪以為貪湯嘅奉承擦鞋功力只係得咁少，有傳佢最令人印象深刻嘅係大送「非物質禮物」，禮物都有非物質？
據聞貪湯擦功寶典內有一招「親自接機」，就係喺上司出差返港後親自去機場接機。驟耳聽落呢招過於肉麻，僅屬冧招，難有大作為，但唔好睇小呢啲老套招數，據聞呢招曾經令到一啲看似外剛內柔嘅上司都差啲溶化。貪湯冧招雖然耍家，但可唔可以冧到班立法會議員仲係未知之數。
立法會帳目委員會尋日去信邀請貪湯及廉政公署社區關係處處長穆斐文出席調查聆訊。不過，呢封邀請信就由電郵發出，好似有啲兒戲。貪湯到依家都未有公開露面，之前都係透過一位「梁小姐」發言，立法會透過電郵邀請佢出席聆訊，如果佢話收唔到都吹佢唔脹，唔知貪湯最後會唔會扮唔知缺席聆訊呢？