政情：惹火長毛千夫所指
立法會唔知係咪風水唔好，前日明明係社民連議員梁國雄（長毛）議員辦公室失火，點知因為灑水系統狂噴，累到十幾名議員間房水浸。為安全起見，秘書處前日截斷大部分電源，所以班議員都唔知辦公室嘅電器有冇壞，直到尋日重返「災區」點算損失時，先至發現唔少電子產品都報銷。無辜受害嘅議員表明要有關方面徹查事件，唔知當查明起火真相後，佢哋會否集體向長毛索償損失呢？
電子產品報銷 卡片濕晒
因為立法會大樓嘅豆腐渣工程，長毛十樓辦公室嘅灑水系統嘅水，大量流落下層，好似九樓教育界葉建源就最少有兩部電腦報銷，佢隔籬房嘅會計界梁繼昌亦難逃水劫，有一部手提電腦、一部平板電腦再加一部打印機全部失靈，就連佢心愛嘅名牌真皮公事包亦要提早「退役」，總共損失兩萬元。至於梁繼昌隔籬嘅資訊科技界莫乃光，七十張卡片都搞到濕漉漉，要鋪喺窗台曬番乾。
今次水災橫跨五層樓，由十樓一直漏水漏到六樓，所以位於八樓嘅批發零售界方剛都難逃一劫，佢枱頭部電視機同樣玩完。方剛黨友張宇人（Tommy）間房喺正隔籬，前日仲話傳出臭味，好彩尋日視察後發覺冇乜事。
張宇人驚紅酒甩出世紙
我哋前日影到Tommy嘅職員第一時間將房內十支紅酒擺出房外，唔通係臭味源頭？佢話冇咁嘅事，又話最擔心唔係啲酒變壞，反而係驚酒樽上招紙甩咗啫。酒樽上嘅招紙猶如酒嘅出世紙，如果甩咗就唔值錢嘞。
至於再低一層嘅旅遊界姚思榮，損失冇樓上咁嚴重，只係枱頭一部電話同一部收費電視解碼器失靈，而秘書處亦已派人搶修。據聞秘書處為咗吸乾所有積水，尋日突然降低中央冷氣溫度，但變相令議員房間好似冷凍庫咁，搞到班議員唔敢久留。事件中，同長毛同層嘅工聯會、工黨等就冇乜事，工聯會黃國健話，本來以為自己間房一定濕過濕地公園，點知尋日發現間房安然無恙，即時放下心頭大石，原來啲水只係流經地氈底。
警方前日將有關案件交由中區警區刑事調查第三隊跟進，但尋日傍晚警方再出新聞稿話，案件現已升級交由中區警區重案組第一隊展開調查，但究竟查成點，大家就密切留意喇。