中環出更：「雪地女王」獲頒榮譽院士
全球首位涉足三極嘅香港女探險家李樂詩（Rebecca），尋日獲中文大學頒授榮譽院士，校方喺典禮場刊撰文中，封佢為「香港雪地女王」。Rebecca透露，近日為年底於中大開幕嘅氣候變化博物館，埋首整理過去逾十八次出征南北極嘅資料。佢笑言，一世人都冇休息過，希望退休後重拾畫筆。
Rebecca話，自己熱愛文化藝術，精通中國畫、西洋畫、雕塑及木刻，只係幾十年來為咗極地研究而捨棄興趣，日日做足十六小時，連畫展都唔敢去睇，深怕一睇到藝術品會技癢。佢坦言，早於二十六年前已經萌生設立極地博物館嘅念頭，連工廈、丁屋、學校等場地都搵過晒，可惜到處叩門都不獲支持。
致力建設氣候變化博物館
直至數年前Rebecca獲邀出席中大講座，與當時仲係逸夫書院院長嘅中大校長沈祖堯首次碰面，佢鼓起勇氣向對方表達宏願，估唔到對方拍心口應承：「中大咁多地方，一定冇問題！」後來沈校長言出必行，Rebecca由衷感激。
尋日同場仲有資深大律師陳志海、紡織界老行尊陳瑞球、中國工商銀行（澳門）副主席及執行董事禤永明、著名慈善家梁顯利兒子梁紹鴻等獲頒授榮譽院士。陳瑞球姪仔陳永棋及身為中華廠商聯合會副會長嘅愛女陳淑玲齊現身祝賀。
卓妮