中環出更:「大會堂之父」獲終身成就獎

藝術發展局尋晚舉行藝術發展獎頒獎禮,其中有「大會堂之父」稱號嘅前藝術發展局主席陳達文獲頒終身成就獎,由特首親自頒發呢個至高榮譽。大會仲送咗個意外驚喜畀陳達文,就係安排佢兩位公子,即香港大學法律學院教授陳弘毅,以及任建築師嘅弟弟陳弘志忽然現身,先後獻上鮮花及自家製作嘅大會堂高座模型,令陳達文好感動。

兩子現身 陳達文驚喜

陳弘毅致詞時,盛讚爸爸為文化界奉獻一生,又憶述自己同爸爸於大會堂嘅點滴。佢話大會堂成立咗五十一年,係香港首個具規模嘅文娛中心,盛載咗唔少集體回憶,亦印證佢同弟弟嘅童年足迹。因為佢父親擔任大會堂副經理,所以佢同弟弟經常接觸各種藝術表演,尤其爸爸參與創辦嘅香港管弦樂團、香港中樂團、香港兒童合唱團等,帶領佢進入藝術家嘅奇妙世界。

陳達文就好感觸話,十年前藝發局首次舉辦呢個頒獎禮,佢以藝發局成員身份喺台下觀禮,冇諗過十年後會上台攞獎。雖然佢已經退休,但仲好回味喺大會堂同藝術家朋友嘅交流時光。

卓妮

第一手消息請下載on.cc東方互動iPhone/iPad/Android/Windows Phone Apps