財政司司長曾俊華每星期日都會喺網誌撰文，每次都為大家帶來唔少歡樂，好似尋日咁，佢話最近去過一香港禮品及贈品展，發現唔少參展商都好有創意，好似其中一間專賣環保產品嘅公司，唔止用咖啡渣做水杯，仲識得利用回收廢膠做健身啞鈴。
點知鬍鬚曾好似大鄉里出城咁，話好驚訝間公司可以諗到好主意，將好輕嘅廢膠改變成好重嘅啞鈴。鬍鬚曾仲要懶神秘唔開估，話如果想知答案就電郵畀佢喎。雖然司長無開估，但稍為有常識都知，呢種廢膠啞鈴可以注水喺入面，所以想幾重就加幾多水。好彩佢無應承估中有獎唧。
其實入水啞鈴呢樣嘢，發明咗都唔止十年，旺角女人街大把有得買，鬍鬚曾呢啲「中產」竟然可以當係新興事物，反映到佢真係不吃「民間煙火」。不過咁，雖然佢次次都寫埋啲普羅百姓唔明嘅火星文章，但總算喺周日呢個平淡時刻，帶畀大家少少歡樂嘅。