政情：拉布累「畫地為牢」WK最遠只敢去會展
立法會連日來審議財政預算案嘅拉布戰，令唔少議員都犧牲咗個人活動嘅時間。工程界議員盧偉國（WK）尋日自爆為咗開會，唔少本來應承咗出席嘅業界活動，到最終都只好推卻，惟有地點比較接近立法會大樓嘅地方佢至敢去，最遠係灣仔會展中心。佢話就算去都係速去速回，趕喺要求點人數嘅鐘聲響起之前返回座位，真係辛苦晒。
WK話，自己每次去會展，都會花十幾分鐘快步行，回程亦如是，唔會坐車，事關會展一帶嘅交通咁擠塞，塞一塞車隨時耐過行路。呢場拉布戰影響到WK逢周三晚冇得入馬場，佢坦言已經預咗，但出席唔到學會、商會嘅講座同會議，佢就覺得有啲無奈。
愛駒上訴得直跑第二
講番尋日，WK一支公現身沙田馬場，為佢隻愛駒「京城三寶」打氣。初時賽果公布「京城三寶」跑得第三撻Q，但WK覺得愛駒係畀前面馬匹干擾，先至上唔到位。後來佢同練馬師商量後，決定向馬會抗議，最終上訴得直，「京城三寶」由第三躍升第二，獎金由六萬多元「加碼」至十一萬八千多元，WK即時笑逐顏開。