中環出更：老婆腳傷夏佳理要挽袋
近日時晴時雨，尋日難得天氣好轉，唔少政商界名人都同另一半拍住拖入沙田馬場輕鬆吓。剛剛退任香港交易所非執行董事嘅夏佳理同太太夏安麗孖住現身，但見左腳打晒石膏嘅夏安麗揸住兩支拐杖，舉步維艱咁前進，難得佢依然保持儀態兼笑容滿面示人。身邊嘅夏佳理，特登行慢半拍遷就太太，仲幫太太攞手袋添。
夏安麗話，日前唔小心碌咗落樓梯跌斷左腳，好彩傷勢唔算嚴重。夏佳理夫婦一向鍾情賽馬運動，估唔到連整傷腳都堅持入場。夏佳理之前都有跣親嘅經驗，佢當時話最大嘅體驗，係對殘疾人士嚟講，無障礙通道係幾重要。
名人夫婦拍拖現身
同場見到港區人大黃友嘉（David）夫婦，佢話係馬會大董陳南祿約佢食飯。David同太太笑容一致，好有夫妻相。仲有九巴後人雷添良夫婦，梁智鴻同太太馮令儀等成雙成對咁現身，認真sweet。全國政協盧文端同公子盧金榮都入場，捧愛駒「福建精神」出賽。