中環出更：何俊賢潮着入馬場 唔合規格
出入賽馬會嘅衣着有一定限制，不過對於漁農界立法會議員何俊賢（高佬賢）呢個馬場稀客嚟講，就可能唔多清楚嘞。尋日佢受馬會主席施文信邀請入沙田馬場食飯，Gel行個頭嘅佢，身穿黑色皮褸、直條恤衫、洗水牛仔褲及尖頭皮鞋現身。係就係幾型嘅，不過基本上成套衫都違規囉。結果佢被馬會職員「特別招呼」，帶佢去換番條專為貴賓預備嘅西褲至上得廂房。之但係高佬賢成六呎三吋高，唔知馬會啲褲啱唔啱佢着呢？
高佬賢自知着錯衫，都顯得有啲尷尬，佢解釋話，自己朝早忙完公務至趕入馬場，所以冇時間換衫。佢透露，今次入嚟食飯之餘，主要係同一班醫學界人士會面，傾吓關於本港預防H7N9禽流感嘅情況。
李文斌借西裝褸畀下屬
着錯衫嘅唔止高佬賢，仲有理文造紙董事總經理李文斌（Edmond）嘅一名男職員。話說尋日Edmond匹愛駒「包裝動力」出賽，身穿綠色西褲、白色恤衫，打綠白間斜紋呔嘅佢，帶埋一班來自東莞紙廠嘅員工入場湊熱鬧，仲拉大隊落馬匹亮相圈睇馬。卓妮留意到其中一個男職員着住嘅綠色西裝褸，同Edmond條西褲顏色一模一樣，心諗：唔通事有湊巧？
冇幾耐，佢哋由亮相圈行番上大堂，此時Edmond追住男職員，趕緊向對方取回西裝褸，終於湊成一套完整西裝。原來佢見男職員着恤衫冇打呔，唔符合落沙圈嘅衣着規格，於是借西裝褸畀對方頂住先，呢個老闆認真唔話得。
卓妮