中環出更：山頂玩空中鋼索非幻想
上山頂除咗坐纜車，仲有得盪鞦韆同玩空中鋼索？呢個並唔係幻想，未來有機會化為現實。山頂廣場本屬恒隆地產所有，尋日該集團董事總經理陳南祿（Philip）同傳媒聚會時就話，有意將山頂廣場革新成別具特色嘅旅遊玩樂點，並希望政府能夠作出相應配合。
陳南祿「想起個最長嘅鞦韆」
山頂廣場風景宜人，登上三樓觀景台可以飽覽維港景致，廣場對面仲有棟充滿建築特色嘅凌霄閣，一直吸引唔少本地及海內外遊客前往參觀。不過，創意無限嘅Philip認為咁樣仲未夠，希望將山頂廣場居高臨下嘅優點加以善用。佢話：「點解我哋唔可以喺山頂上起個最長嘅鞦韆，又或者喺兩棟大廈之間拉條空中鋼索？」
另外，Philip亦建議美化集團旗下嘅銅鑼灣百德新街，首要係將地磚翻新及劃一設計，再換過晒啲垃圾桶，但佢強調，以上建議並非一時三刻可以實行，仲要同政府及其他發展商從長計議。Philip向來主意多多，佢喺千禧年擔任海洋公園董事局主席時，就成功令該園轉虧為盈，最為人津津樂道嘅就係首創萬聖節「十月全城哈囉喂」主題活動喇。