今屆政府揚言要走入群眾，主動去收集市民嘅意見。以為老細咁積極，下屬會更勇猛，點知我哋最近聽聞，喺全港十八個區議會入面，其中一區嘅民政事務專員極為龜縮，莫講話示威人士，連有普通市民要求見佢，佢都要諗過度過，真係唔知佢係怕事定官僚嘞！
話說呢位專員調職去到呢區初時，做事已經冇乜意見，當區議員就覺得佢好好商量啦。點知原來佢係真「冇意見」，議員點話點好，而嗰區又出名大佬多，個個都要話事嘅話，點算呢？終於搞到依家人人講起呢位專員都嘆晒氣。嗰區又有同商販有關嘅問題，商販要求見官員，議員就諗住搵專員去一定掂，點知呢位專員淨係派下屬出席。其實身為地方官唔了解區情嘅話幾弊呢，所以啲議員咪要求專員親身落區了解問題囉。點知呢位專員依然話諗吓先，最後事情更不了了之，激到啲人紮紮跳。