中環出更：與仔女撐抬腳 他信勁冧
前泰國總理他信（Thaksin Shinawatra）熱愛香港，不時都見佢嚟香港食好嘢同買靚嘢。卓妮尋晚又見到他信現身灣仔富豪飯堂，而且唔止佢一個，仲有兩位千金及公子同行，唯獨欠他信太太。佢哋喺飯堂內撐枱腳共享天倫，逗留咗個半鐘至離開，臨別前三子女更主動上前吻別及擁抱爸爸，sweet到暈。見佢哋一家人又拖又錫，唔使問都知道佢哋感情非常好。
尋日傍晚六點十分，衣着簡便嘅他信與三個仔女及一名保鏢同坐私人座駕抵達富豪飯堂，先落車嘅佢走在最前面，三仔女緊貼其後。精神抖擻嘅他信一貫笑意盈盈，見到卓妮即停低腳步，等埋仔女一齊企定定影相，之後拖住其中一名愛女進入。
乖女不捨 臨走錫面頰
卓妮見佢兩位囡囡亭亭玉立，衣着新潮加上薄施脂粉，明艷照人，囝囝亦深得爸爸真傳，帥氣十足。
直到七點五十分，他信一家用餐完畢，先後步出飯堂離開。臨走前兩個乖女似乎對爸爸依依不捨，一同撲向其懷抱，左右夾攻他信面頰深情一吻，他信即甜到入心，不知幾陶醉。囝囝就比較內斂，冇同爸爸吻別，只係同佢輕輕擁抱。
等車期間，他信非常友善，同卓妮揮手道別。問佢享唔享受餐飯？佢甜絲絲咁答：「Yes!」冇幾耐七人車到，他信先送三仔女上車，自己同保鏢隨後則乘坐名貴私家車離開。
卓妮