中環出更：雕塑贈嶺大 墨國藝術家報恩
墨西哥距離香港好遙遠，但其實墨、港兩地都有唔少交流，好似嶺南大學目前就有五位來自墨西哥嘅交換生，墨裔經濟學家施雅德教授更出掌副校長職務。嶺大校園尋日仲多咗一件由墨西哥著名雕塑藝術家Jose Sacal所捐贈嘅雕塑作品，就連嶺大校董會主席陳智思（Bernard）早前亦曾經同墨國總統有一面之緣。
當年由副校長父接生
嶺大今次獲贈名家雕塑品，原來係由副校長施雅德教授穿針引線促成。據年近七旬嘅Jose Sacal透露，施雅德嘅爸爸係一位醫生，當年負責幫佢接生，令佢有機會來到世界。為咗支持施雅德教授任教嘅嶺大，Jose Sacal耗時三載製作名為Effort嘅雕塑，希望同學從雕塑之中領略到努力不懈與超越自我嘅學習精神。
作品喻不懈 力求進步
曾經攻讀美術嘅Bernard就認為，呢件雕塑充滿獨特風格，係不可多得嘅藝術精品。對於雕塑當中力求進步嘅寓意，對比今日香港每況愈下嘅狀況，Bernard就話香港花咗唔少精力平衡各路持份者嘅利益，面對周邊地區嘅競爭難免力有不逮。不過，佢話呢啲係民主進程嘅代價，好難避免喎。
講開墨西哥，Bernard話說喺本月初嘅博鰲論壇前夕，佢同太太到九龍某酒店餐廳撐枱腳時，就遇見一對外籍男女由大批保安人員簇擁而入並於鄰桌就坐。Bernard一見勢色就知道佢哋身份顯赫，馬上利用智能手機上網搜尋，得知身邊嘅人物就係現任墨西哥總統及其夫人，本來有向對方索取簽名嘅想法，但目睹總統伉儷跟賓客言談甚歡就無謂打擾嘞。
卓妮