中環出更：與夫鬥氣 梁美芬「愛」包容
立法會議員梁美芬讀法律出身，但返到屋企，原來係小女人一名。佢老公就係城大法律學院院長王貴國，兩口子都係鐵齒銅牙，鬧交難分高下。梁美芬就話，即使同老公有爭拗，唔會鬥晒法律觀點，而係以愛心包容對方。
喺屋企多數扮調解員
梁美芬日前出席城大法律學院祝捷會，班學生喺奧地利維也納舉行嘅國際仲裁辯論賽中奪冠，擊敗全球近三百支隊伍，更拗贏來自哈佛、耶魯大學嘅高材生，為港爭光。咁高興，城大校董會主席胡曉明（Herman）、校長郭位、法律學院國際顧問委員會聯席主席葉錫安等齊現身打氣，當然唔少得王貴國。
與老公同場，梁美芬變得小鳥依人。問佢同老公比，邊個鬧交叻啲，梁美芬話，喺屋企多數扮演調解員角色，有次見老公對兒子嚴厲訓話，佢馬上「家嫂」上身，好言相勸話，兒子只係七歲小朋友，唔係大學生，叫老公唔好咁惡喎。
講起做「和事老」，胡曉明都係專家。佢笑言遺傳了爸爸嘅好脾氣，調解糾紛時曉得「退一步海闊天空」，大事化小，小事化無，結果每次都成功「拆彈」，又唔會得罪人喎。