中環出更：羅德榮與友慈善行撐盲人
創會五周年嘅「香港盲人體育總會」，日前喺沙田中央公園舉行一年一度慈善步行，城中名人與一百名視障運動員齊參賽，身為該會理事嘅餐廳股東羅德榮（Benson）就拉埋老友行大運，好似潮青名譽參事陳光明、百仁基金副主席顏志永都出錢又出力。
妻兒一組親子樂
活動吸引約一千人參加，齊齊繞住城門河行三公里，Benson同太太、囝囝組成三人行，樂也融融。講起做運動，Benson大讚盲人天賦高，跑步、游水、打高球，樣樣精。佢見過盲人跑起步來，仲快過領跑員，搞到對方索晒氣，但打高爾夫球就比正常人花多一倍時間喇。
對盲人瞭若指掌，皆因Benson過去兩年幫助盲人免費製作發聲書籍，至今已有三、四十本，包括名著《三字經》，等失明人士可以博「聽」群書，增進知識。佢又不時出錢贊助失明運動員出外參加國際比賽，認真唔話得。
卓妮