內地貪官除了多雷語，更愛廢噏；像不久前的廣東湛江市人大代表、興隆村黨支部書記黃康生，帶隊去泰國睇色情表演，亂抓人妖乳房嘅網照曝光，他被停職查辦後還口響：「人妖都是男的，我一個男人抓另一個男人的胸部，有甚麼不好的呢！」
內地貪官嘅廢噏，即使是雷語，其廢噏倒也充滿娛樂性，點都好過廢官翻閹嘅周一鑊，不在其位卻不自量力的撈過界，亂扯一通九唔搭八，一時批評教育政策，一時講吓限奶令，一時指手畫腳講普選，一時又大發禽流感謬論……阿哥，你家陣執身彩孭個平機會主席，主力負責執行四條反歧視條例，呢方面又唔見你有乜高見，一味發空炮，要將現行四條反歧視條例合併，又話對同性婚姻持開放態度，又要為性傾向歧視立法……周一鑊之流，又係講咗當做咗！
周一鑊做食衞局局長時，每有大鑊嘢都見佢心不甘情不願出來噏幾句「阿媽係女人」嘅廢話，好似沙士期間就叫大家戴口罩，少啲去公眾場所；對付禽流感就要將雞煮熟，咁就個個月穩袋三十幾萬人工，好官我自為之，「每周一鑊」又怕甚麼？如今佢廢官翻閹，大家幾乎日日喺娛樂版見到佢，睇佢唱同志名曲，七情上面，又摸頭又瞇眼，享受得佢個冧樣，不過有市民就覺得佢鬼上身！
法國思想家布萊斯‧帕斯卡說：一個好社會，應該學會傾聽，學會尊重每一根蘆葦的思考與生息，讓每一根蘆葦獲得並擁有持久的公正。
不幸的是，身為平機會主席的周一鑊，被同文一語點中佢患了過度活躍症，不愛傾聽，五音不全卻只愛扭身扭勢、鬼上身的號哭虐待聽眾！
廢官翻閹，佢自己娛樂至死！納稅人養一個咁嘅廢官，成日見到隻黑鑊，日日聽到噪音，香港想唔躁爆都難矣！