潮流興「惜飲惜食」，唔少環保團體近年積極推廣無翅宴、環保海鮮同六道菜等菜單，政府亦早喺二○一○年，鼓勵政府各部門喺以公帑埋單嘅中式宴會上，盡量只叫六道菜甚至更少，避免造成浪費，飲食界一直響應支持。不過，有飲食界人士向我哋透露，有環境局高官環保「過咗龍」，曾透露六道菜都嫌太多，建議推出「四道菜」菜單，令在場嘅業界人士Ｏ晒嘴。
高官本身係環保先鋒，除咗身體力行慳水慳電，亦落力宣揚環保政策，可惜唔係個個受落。
該名飲食界人士認為，傳統中式飲宴由八道菜減至六道菜已經係一大突破，如果再要減到「四道菜」，其中嘅「四」字諧音「死死」聲，係飲食界最棹忌嘅，而幫襯食肆嘅顧客亦都會覺得唔多吉利，所以業界聽到「四道菜」嘅建議時，Ｏ嘴之餘亦暗批高官不食人間煙火，唔知行情、亦唔知民間習俗。