政情：長毛燒鬚 幫人剪布？
立法會預算案拉布戰明日展開，拉布四子本來提出超過七百六十二項修訂，當中最多梗係社民連主席梁國雄（長毛），佢一口氣提三百幾項修訂。但唔知係佢大頭蝦定專登，竟然有三十項刪減部門首長薪酬嘅修訂，唔記得將佢歸入條例草案嘅開支總目，立法會主席曾鈺成當然否決佢提出呢三十項修訂啦。拉布戰未開始長毛已先輸一小仗，似乎長毛今次唔係好認真喎。
政府睇過七百幾項修訂後，曾經向曾鈺成提出意見，話長毛部分修訂唔合規矩，立法會將呢個意見轉達畀長毛，長毛話願意修改字眼，不過曾鈺成就認為長毛肯改都於事無補，因為已經過咗提交修訂期限，所以唔會批准佢修改。就係咁樣，長毛就眼白白望住自己提出嘅三十項修訂壽終正寢，變相幫曾鈺成剪自己布，好彩長毛提咗三百幾項，得三十項唔合格。
毓民慢必都錯
其實除咗長毛之外，人民力量黃毓民提出嘅部分修訂都犯上相同錯誤，已經主動撤回二十項修訂。另外陳志全（慢必）同民協馮檢基亦分別撤回一條修訂案，令總修訂減少至七百一十條。
到底呢七百一十項修訂案要拉布拉幾耐呢？曾鈺成話部分修訂案相似，已經合併成二百幾項辯論，但未計辯論時間，單係表決時間估計最少都要二十個鐘。
由於呢場仗有排打，聽聞建制派已經着晒避彈衣，唔想負上流會責任，一早編製好一份「輪更表」，確保最少有一半建制派議員留喺立法會，自由黨就話唔會同建制派輪更，佢哋自己會派代表當值。而其他無參與拉布嘅泛民雖然無共識，但各黨都會派人留守立法會，例如民主黨就話基本上有三位黨員會喺立法會。
立法會對拉布愈嚟愈有經驗，對開會時間都預先傾好，唔使到時狼狽。曾鈺成話現階段無議員支持通宵開會，暫時決定朝九晚十算數，唔會喺周六、日開會，亦唔諗住要周五嘅內會、財委會讓路，到時會畀佢哋照開，至於一般委員會如果係有公眾時段，亦會如常召開。