中環出更：葛輝閒逛中環 難掩肚腩
年前踢爆港府喺上網學習支援計劃遴選程序中有政治干預嘅前政府資訊科技總監葛輝，自從以私人理由提早離任之後，鮮有喺公開場合露面。卓妮早幾日喺中環遇到着西裝冇打呔嘅佢，拎住個連鎖百貨公司嘅購物膠袋，好悠閒咁逛街。一頭招牌銀髮嘅葛輝面帶笑容昂首闊步，望落精神爽利，看來發福不少。
久未曝光 神態輕鬆
當日下晝兩點半，葛輝一支公現身中環歷山大廈，經由行人天橋，再沿港鐵站通道走到IFC。卓妮見佢神態輕鬆自若，左手拎住一個裝滿食物嘅膠袋，應該係剛剛去完超市買嘢。久未曝光嘅葛輝似乎日漸心寬體胖，喺西裝褸半掩下，脹卜卜嘅肚腩若隱若現，從後望佢嘅體形，更有向橫發展嘅趨勢。
行行吓，葛輝遇到一位外籍朋友，隨即停低互相問候，之後仲將友人畀佢嘅卡片收好。最後葛輝走到IFC地庫嘅停車場，駕駛私家車離開。