新人可以為一個組織注入新諗頭，據聞本身係游泳健將嘅公共專業聯盟梁繼昌（Kenneth）有意搵立法會同僚組隊參加一年一度嘅維港渡海泳，如果成事，一定可以提高立法會議員處於低位嘅民望。
維園渡海泳自前年復辦以來，深受市民歡迎，其中去年參賽人數更突破一千六百人。曾喺中學時代做過游泳校隊成員嘅Kenneth，據聞有意發起搞立法會游泳隊，然後組隊一齊參加渡海泳，已經接觸過自由黨鍾國斌（Felix）呢個運動健將，事關佢每周都會去游水兩至三次，就算有風有雨都會改喺室內泳池游水。Felix證實Kenneth係有同佢傾過吓呢件事，但佢強調依家係「十畫只有兩撇」。
除咗Kenneth同Felix外，聽聞金融界吳亮星（星爺）都係「游得之人」，有時間就會去馬會游水鍛煉身體，至於星爺肯唔肯組隊參賽，就要睇吓佢哋牙力夠唔夠喇！立法會過往有足球隊，但好多時都唔夠人要搵外援，如果泳隊成事，就確係帶嚟新氣象喇。