政情2.0:公民講場:廢官過界論政 亂噏一鑊

外號「周一鑊」嘅平等機會委員會主席周一嶽日前接受電視台訪問時,又再踩過界亂噏,佢喺節目中高調評論二○一七年特首選舉辦法,話自己支持有提名同初選制度,希望初選機制有廣泛代表性、增加普及元素等。佢現時嘅工作同政制完全無關,佢好有興趣對所有唔關佢事嘅問題都無聊搭訕,呢啲咁嘅意見,參考價值完全等如零啦。好心大家唔好再問佢同佢無關嘅問題啦,佢嘅意見同一位老太去到街市乜都彈,有乜分別呀?