財政預算案「拉布戰」一觸即發，由於今次拉布唔係講笑，如果拉布議員同政府都唔肯讓步的話，分分鐘令到公務員出唔到糧，影響政府運作。所以政府內部近日絞盡腦汁，希望度到條好橋，阻止今次呢場拉布戰，但諗來諗去都係度唔掂，仲曾經諗過使橫手。
其實政府開始時諗住用正路方法拆招，例如引用《基本法》第七十四條，即係逢立法會議員提出嘅法律草案，都唔可以涉及公共開支或政治體制，否則就要經特首同意，但呢個無疑將責任放喺立法會主席曾鈺成身上，曾主席未必願意幫政府開路。
第二招係引用《基本法》第五十條，即如果立法會拒絕通過政府提出嘅預算案，特首可以解散立法會重選。政府有諗過拉布狀況等同「拒絕」通過預算案，有權解散立法會，但係呢招絕過核彈，未到最後一步都唔會用。
既然正路唔通，惟有使橫手，有政府中人認為最有效、最低成本方法係從建制派挑選一兩位悍將，然後主動向拉布議員「撩交嗌」，等佢哋扯晒火時自然容易犯議事規則，然後曾鈺成就有機會將拉布議員趕出議事廳，咁佢哋嘅修訂亦都唔可以提出，到時就算有建制派齊齊被逐「陪葬」，條數都好划算。